Autismo, Competir con uno mismo

Kaixo lagunak!!

Gaur bideo oso interesgarri bat eskegiko dut. Informe Robinson Programak bideo interesgarri bat egin zuen autismoa zuten umeekin. Hauek futbolan jolasten zuten. Hemen azaltzen dira haien zailtasunak, baina baita ere haien gogoak futbolean jolasteko.

Mesedez,  hogei minutu badaukazue ikusi, oso polita baita.

Eskerrik asko, hurrengora arte.

Zertarako balio du kirola umeetan?

Kaixo berriro ere!!

Gaur dokumentu bat utziko dizuet non agertzen den zertarako balio du kirola umeetan. 10 arrazoi oso garrantzitsuak ikusteko zein inportantea den kirola gure munduan.

Eskerrik asko blog hau jarraitzeagatik.

http://www.abc.es/20120928/familia-vida-sana/abci-diez-razones-correr-201209271642.html

Haurtzaroko kirolaren arriskuak heziketa ikuspegitik

1. Sarrera

Badirudi, historian zehar, kirolari betidanik aitortu izan zaiola, eragin hezitzailea. Europako kultura klasikoak aztertzea besterik ez dugu hori frogatzeko. Herritarrek kirolaria ezaugarri positiboekin lotu ohi dute: ohitura osasuntsuak, drogarik gabekoa, nortasuna orekatua, borondate indar handia, porrotari aurre egiteko gaitasuna, arau sozialak errespetatzen dituena.
Benetan onartua dago kirol jarduerak banakoaren izaeraren formakuntzan duen eragin pedagogikoa, bai eta bere garapen etiko eta moralean ere, zein trebetasun sozialen eremuan.

2. Beti al da, ordea, haurtzaroko kirola hezitzailea?

Dena den, balio hezitzaile ugari landu badaitezke ere, garbi izan behar dugu beti ez direla eskuratzen. Eguneroko errealitateak azaltzen digu, jarduera bera maiz ez dela hain arrosa kolorekoa izaten, parte hartzen duten haur guztientzako beti ez dela hain positiboa eta onuragarria gertatzen.
Kirol jarduera hori antolatzerakoan aintzakotzat hartutako irizpide, ikuspegi eta helburuek baldintzatuko dute parte hartzaileek jasoko dituzten ondorioak. Berez, gaitasun hezitzaile potentzial hain handia duen jarduera honek baditu praktikan gainditu beharreko hainbat arrisku eta aldagai kaltegarri, irizpide pedagogikoetatik baloratuta, beti ere. Azter ditzagun bada.

2.1. Gehiegizko lehiakortasuna

Kirolaren berezko ezaugarria da norgehiagoka, dema eta besteari aurrea hartu nahi izatea, bere neurrian egiten den bitartean. Ezinbestean irabazi beharra eta emaitzari gehiegizko garrantzia ematea ez dator bat irizpide hezitzaileekin.
Satisfazio iturri gisa, garaipena soilik ezartzeak: frustrazio, dezepzio, atsekabe eta porroteko sentsazioak eragin ditzake. Sentimendu negatibo hauek nortasunaren beste eremuetara zabaldu egiten dira kasu askotan. Hau da, ondorioa ez dela mugatzen kirolari moduan bere buruaz ikuspegi eskasa izatera; pertsona gisa oro har, frakasatua sentitzera baizik.
Gehiengoarentzat eskuraezinak diren helburuak ezin diezaiekegu guztiei ezarri. Ez da zilegizkoa kirol jarduerak nortasunaren prestakuntzan laguntzen duela esan, onura psikologikoak eragiten dituela, eta gero etengabe frustrazio eta porroteko egoerak eragin. Irabazle bakarra eta galtzaile ugari izatea; edo aurkariaren porrota norberaren arrakastarako ezinbesteko izatea, ezaugarri desegokiak ditugu irizpide hezitzailearen arabera.

2.2. Helburu desegokiak

Xede hezitzaileekin antolatutako kirol jardueertan kontu handiz zaindu behar dugu zein helburu eta motibazio dituzten parte hartzen duten agente desberdinek.
Zenbait kasutan batetik helmuga oso zorrotzak edota altuak ezarri ohi dira, (eta ez lortzea erabateko porrotarekin lotu): garaipena, titular izatea, sailkapeneko lehen postua, selekziorako txartela... Komenigarria litzateke gure esku dauden helburuak finkatzen ikastea; eta ez besteen jardueraren menpe daudenak. Norbere hobekuntzara, ikastera, gozatzera bideratutako motibazioan oinarritzea; eta ez, emaitza, garaipena, besteekiko errendimenduan. Gutxi batzuen esku bakarrik dauden aukerak guztiei helburu gisa ezartzeak epe luzera dezepzionatutako talde zabala ereitea suposatzen du.
Kiroleko goi mailako izarren bertute, ondorio positibo eta alderdi on guztiak saltzen dizkigute etengabe; baina ezkutatu egiten digute egoera horren atzealdea. Ez dakigu bere garaian ospe izugarri hori ezagutu zuen hainbat jende nola bizi den egun; baina batez ere, gailurrerako bidean gelditutako haur andana horrekin zer gertatu den. Hau da, ume kopuru izugarria abiatzen da lasterketa horretan, egunen batean beren ametsetako maila hori lortze aldera, baina lekua oso oso gutxientzat soilik dago ordea. Haurrari lagundu egin behar zaio bere itxaropenak egokitzen; aurrerago hain zabalduak diren porrotezko sentimendu horiek saihesteko.

2.3. Inguruneko gehiegizko presioa

Kirol txapelketetan bizi den giroan maiz gehiegizko presioa egon ohi da, errendimenduzko itxaropen altuegiak ezartzen dira (nahi eta ez irabazi beharra, zenbaitetan), eta honek parte hartzen duen haurrari nolabaiteko barne gatazka sortzen dio. Egoera honen adierazleen artean estresa, ziurgabetasuna eta zalantza, egonezin psikikoa, eta herstura aurki ditzakegu. Kontuan izan behar dugu adin hauetan haurrek zer-nolako garrantzia eskaintzen dieten kirol trebetasunei; eta bestetik, kanpoko eraginen aurkako sentiberatasuna.

2.4. Konparaketa soziala

Kirol lehiaketak zorroztasun handiko ebaluaketa soziala eragiten du. Ondorioz, autokontzeptuaren garapenean eragin adierazgarria izan dezake. Bestalde, besteek egindako balorapen hau garapen psikoafektibo bereziko aro batean gertatzen da: jarduera fisikoetan trebea izateari garrantzi handia eskaintzen zaion unean; eta kanpoko mezuekiko oso sentiberak diren garaian. Eragin negatibo hau nabarmenagoa izango da batez bestekoa baino maila eskasagoa dutenen artean. Esparru desberdinetan eragingo du: eskolako eginkizunetarako duen motibazioa, izaera, nortasuna, harremanak, bere buruaren onarpen maila...

2.5. Espezializazio goiztiarra

Haur bat kirol edo postu zehatz bakarrean aritzeak, pertsonaren aberastasun motorea mugatzen du, bai eta etorkizunerako kirol ohitura anitzak garatzeko aukera ere. Era berean, momentuko errendimenduari eta emaitzari soilik lehentasuna eskaintzea ez da zuzenena, irizpide hezitzaileen arabera.
Haurtzaroan haurraren garapen psikomotorea bere osotasunean jorratu beharko da. Oinarrizko trebetasun motore hauek ondo landuta izateak oinarri sendoa emango die etorkizunerako, gai izango baita aurrerantzean edozein kirol jarduerara egokitzeko.

2.6. Aukeratze prozesuetarako irizpide zorrotzak

Hainbat erakunde pribatu eta kirol elkarte gero eta goizago joaten dira ikastetxeetara haur bila. Gaitasun onenekoak oso umetan bereizten dituzte. Haur kopuru urria aukeratu arren, erabaki horrek eragin nabarmena izaten du beste guztiengan: autoestimua eta kirolean jarraitzeko motibazioa, oro har, erabat jaisten zaie, parte hartze kopuruak hondoa jota utziz.

3. Ondorioak

Kirol jarduera onura fisiko, psikologiko, sozial eta hezitzaile ugariren iturri izan daiteke. Balioetan hezteko aukera paregabea eskaintzen digu. Baina eragin positibo hori lortzeko baldintza batzuk errespetatu beharko dira: besteak beste, antolatzaile eta hainbat eragilek jarduera horri eskainitako ikuspegia eta helburua. Ildo horretan ere eragin nabarmena izango dute pertsona esanguratsuek, hala nola, entrenatzaileek, gurasoek eta lagunek.
Baloratu egin behar dugu ea txapeldun gutxi batzuk lortzearren pertsona gisa frakasatu eta frustratutako multzo handiak sortzeak pena merezi duen. Kirol eremuan jasotako dezepzioak nortasunaren beste eremuetara zabaldu daitezke. Kirol jarduera gorrotatzeaz gain, autoerrealizatu gabeko pertsonak sor daitezke, autokontzeptu orokor baxua dutenak. Une oro kontuan izan behar litzateke zein pertsona multzora zuzentzen diren jarduerak horiek eta zein ondorio eragin ditzaketen.
Onura posibleak eta arriskuak kontuan izanik, uste dugu eredu hezitzailearen aldeko apustua egiteko nahikoa argudio badirela. Hau da, bere ikasgelako kide naturalekin batera, denentzat parte hartze irekikoa, eskolaren ardurapean (helburu hezitzaileak bermatzearren), izaera ludikoen bidez gozatuz, gaitasunak osotasunean garatzeko jarduera anitzak landuz, heldutasunerako bizi-ohitura osasuntsuak sustatuz.
Haurtzaroan honela aritu ondoren, gerora eskaintza zabalduko litzateke. Gehiengoak barneratutako kultura eta ohitura horiei eutsiko lioke, eta parte hartzeko ikuspegiekin jarraituko luke. Gaitasun eta zaletasun maila handia dutenek, beste helburu eta intentsitate batez aritzeko aukera izango dute, lortutako oinarriek hala ahalbidetzen baitute. Interes desberdinak uztartzen dituen antolaketa honek denen onespena jasotzeko arazorik ez luke izan behar, gure ustez. Gure belaunaldi gazteen etorkizunak hainbeste merezi du eta. 

Informazioa Web horri honetatik hartuta: http://www.euskonews.com/0398zbk/gaia39801eu.html

Bizkaiko Foru Aldundiako gurasoentzako online prestakuntza

Kaixo lagunak!!!

Gaur esteka bat zuekin konpartitu nahi dut. Duela zenbait urte Bizkaiko foru aldundiak oso lan ona egiten ari da gure umeentzako eskola kirolean. Aurten gurasoentzako prestakuntza online bat jarri dute gure esku eta oso interesgarria da guztiontzako begirada bat ematea. Han azaltzen digu zer den eskola kirola, zenbait ezaugarri ematen digu eta abar.

Espero dut zuen gustukoa izatea.

Eskerrik asko denoi!!

Bizkaiko Foru Aldundiako Gurasoentzako online prestakuntza:
http://www.bizkaia.eus/kultura/kirolak/heziketa/index.asp?tem_codigo=6665&idioma=EU&dpto_biz=4&codpath_biz=4|291|2073|2077|2944|6665#texto

BIZKAIKO FORU ALDUNDIAKO PROGRAMA BERRIA

Eskola Kirolaren 2015-2016 denboraldirako programa berria aurkeztu du; programak ia 100 jarduera hartuko ditu. Programaren bidez aukera egongo da era guztietako kirol-praktikak egiteko: errendimendu-kirola, parte hartzeko kirola, hastapen-kirola eta aisialdikoa. Horretarako, Bizkaiko Foru Aldundiak 2.000.000 euroko inbertsioa egingo du.

HurrengoakAurrekoa

Hainbat jarduera motak osatzen dute Bizkaiko Foru Aldundiaren programa hau: lehiaketa-jarduerak, hastapen-jarduerak, aisialdikoak eta teknifikazioa. Guztira, 54 lehiaketa-jarduera, 34 hastapen-jarduera eta aisialdiko jarduera eta 9 teknifikazio-jarduera. 

2015-2016 ikasturte honetan, aurreko urteko jarduerak mantentzen dira, eta, horiez gainera, hauek gehituko dira:

• Kirol egokituko 3 eskola berri.
• Patinajean hasteko ikastaroak (roller street eta free style).
• Zesta-punta D modalitatean inskribatutako eskola-umeentzako lehiaketa.
• 7/9ko futbolean parte hartzeko aukera dago emakumezkoen haurren kategorian.

Lorea Bilbao Diputatuaren hitzetan gaur, programa barritua aurkezteko alkartu gara. Parte hartzen daben guztien beharrizanetara eta gustuetara ahalik eta ondoen egokitzeko barritu dogu. Eguneratu egin doguz eskainitako jarduerak eta izena emoteko prozesua hobetu eta erraztu dogu, erakundeen lana errazteko.

 Heziki

Heziki kirol-jarduera nabarmendu behar da; jarduera hau lehen hezkuntzako lehen eta bigarren mailetako umeentzat da. Heziki barruko zein kanpoko profesionalen, erakundeen eta elkarteen lanaren emaitza da; haien artean, kirol-jarduera bat diseinatu dute benjaminaurrekoentzat.

Pasa den ikasturtean estreinatu zen ekimena, eta arrakasta handia lortu zuen: 1245 umek parte hartu zuten jardueran. Denboraldi honetan espero dugu parte-hartzea areagotzea.

 Nabarmendu beharreko datuak

Eskaintzen diren 100 jarduera horietarako, Bizkaiko Foru Aldundiak hitzarmen batzuk sinatu ditu kirol-federazioekin. Horretarako, 1.200.000 euro bideratu ditu Aldundiak.

Joan den ikasturtean, 2830 pertsona gehiagok (% 8,29) hartu zuten parte eskainitako lehiaketa-jardueretan.

Bestalde, plaza kopuru handiagoa egongo da Eskola Kiroleko monitoreak prestatzeko.

2016ko urtarril-otsailean, 3k programa jarriko da Bizkaiko kirol-erakunde guztien eskura, doan: programa kirol-erakundeen kudeaketa hobetzeko da, eta Euskalitekin batera egiten da (kudeaketa aurreratua sustatzen duen euskal fundazioa).

 Eskola Kirola programaren helburua

Urterik urte berrikusi eta hobetzen da programa, parte-hartzaile guztien beharrizan eta guztietara ahalik eta ondoen egokitzeko. Betiere, helburu hau garbi izanda: BIZKAIKO ESKOLA-UMEEN ARTEAN KIROLA EGITEKO OHITURA OSASUNGARRIA SORTZEA.

Andoni Imazi elkarrizketa

 Gaur Andoni Imazi egin zitzaion elkarrizketa bat "El Pais" egunkarian ekarri dizuet. Espero dut ondo pasatzea berarekin.

Gustatuko litzaioke ordu gehiago libre izatea familiarekin egoteko, ume bat baitauka eta "bestea bidean". Baina naturaltasunez hartzen ditu futbolak eman dizkionak, alde onak eta txarrak. Andoni Imazek umetatik amets egin zuen estadio batean bere burua ikusteaz. Errealitatea eta ametsa ezberdinak direla konturatu zen gero. Adibidez, egun, garrantzia handiagoa ematen zaio diruari: 14 urteko gaztetxoek kobratzen duen fitxaz edo duen autoaz itauntzen diote, sasoi horretan berari burutik pasatzen ez zitzaizkion galderak.Galdera. Futbolariek gauza berdinak esaten omen dituzue beti. Norena da errua, zuena ala kazetariena?
Erantzuna. Ez dakit errurik dagoen. Kirol aldizkariak gehiago saltzen dira. Beraz, baldin badakite erantzun berdinak ematen ditugula, eta hala ere, erosi egiten badituzte, konformatu egiten direla esan daiteke. Nik badakit gure artean arrazoi bategatik ematen ditugula erantzun berdinak: ez dugu gure bizitza nahastu nahi, ez garelako horretaz bizi. Jaten ematen diguna futbola da, ez berriketan aritzea. Elkarrizketa batean hanka sartuz gero hurrengo egunean entrenatzaileak 'nolatan esan duzu hau' galdetzen dizu. Beraz, nahi ez dituzun arazoetan sartzen zara.
G. Gaur egungo gizartean gehiegizko garrantzia ematen zaio futbolari?
E. Azken urteotan kirolak eta behinik behin futbolak izugarrizko garrantzia dauka, baina lehen ere bai. Zuri beltzezko partiduak ikusten dituzu eta estadioak beterik zeuden orduan. Gertatzen dena da orain aukera gehiago daukagula futbola ikusteko. Jendeak informazio gehiago nahi du eta nola bizi garen jakin nahi du.
G. NBAko zenbait partidutan aldageletan sartzen dituzte kamerak. Zer iruditzen zaizu?
E. Amerikarrek egiten dutena goizago ala geroago beti iristen da. Europan beraiek baino zaharragoak gara, beste etika bat daukagu eta agian ez gara horretara iritsiko. Niri ez litzaidake batere gustatuko. Txikitatik futbolean egitea gustatu izan zait, eta ez hitz egitea, ez gauzak harrotzea.
G. Txikitan amesten zenuena eta ezagutu duzun futbolaren errealitatea oso desberdinak al dira?
E. Ametsa literalki esaten dut: oheratu, lo egin eta zure burua estadio batean futbolean ikusi. Baina umetan ez duzu ikusten futbolak atzetik dakarrena, alde onak eta txarrak. Egunero 24 ordutik zortzi kenduz gero, lo zaudenak, gainontzeko orduetan jokalari zara. Kalean geratzen bazaituzte beti erantzun behar duzu, pertsonaia publikoa baitzara. Bestalde, alde ona dauka: diru asko ematen dizu eta bizitza lasaiago hartzea plantea dezakezu.
G. Egun talde handi bateko azpiko kategorietan dabilen mutiko batek zer dauka buruan: kirola ala dirua eta ospea besterik ez?
E. Ez dakit. Baina egia da orain 14 edo 15 urteko mutiko batek ia zenbat irabazten duzun eta ze auto daukazun galdetzen dizula. Horrek pixka bat harritzen zaitu, guk adin horrekin ez baikenuen horretaz pentsatzen. Gauzak berez iristen ziren. Adin horrekin hori galdetzeak futbolak beste alde hori badaukala erakusten du: dirua, ospea, autoa. Gauzak aldatu egin dira.
G. Haur mailako partiduetan gurasoak elkarri irainka edo garrasika ikusten dira. Zergatik gertatzen da hori?
E. Ni infantila nintzela ere bizi izan ditut horrelako eztabaidak. Hori ez da kirola bakarrik. Heziketa ere tartean dago. Ikusi egin beharko litzateke ia umeen ametsa den profesionaletara iristea edo gurasoena ote den. Akaso hori da okerrena.
G. Osasungarria al da institutua utzi berri duten gazteek halako fitxa altua edukitzea?
E. Kirolean gaur egun oso gazte iristen gara. 18 urterekin askotan lehenengo mailan zaude eta oraindik ez zaude erabat osatuta pertsona bezala. Ze aukera ematen dizu horrek? Aukera asko ondo pasatzeko, kezka batzuk alde batera uzteko, ondo bizitzeko..., baina hori ere bukatu egiten da. Beraz, formazioa alde batera uzten baduzu, dirua izanez gero aukera asko dago. Baina, dirurik gabe, beste gauza batzuk landu behar dituzu. Arriskutsua da, baina gauza batzuk ezin dira aldatu. Ezin duzu esan: '30 urte izan bitartean ezin duzu hainbeste irabazi', hori ezinezkoa da.
G. Gogoan izango dituzu UEFAko finalean gertatutako istiluak. Zer egin dezakezue futbolariek horrelakorik gerta ez dadin?
E. Hori fanatismo hutsa da. Heziketa eta kultura hori zuzentzeko daude, baina heziketa eta kultura ez dira pertsona guztiengana iristen. Gero beste gauza batzuekin nahasten da guztia, politika adibidez. Guk gure alea jartzea badaukagu. Nola? Ba hori salatuz, inora ez daramala esanez. Zuzendaritzek ere euren ardura dute. Askok horrelako talde erradikalei laguntzen diete. Hori bukatu egin beharko litzateke. Guk ezer egiterik ez daukagula esatea eskuak garbitzea izango litzateke.
G. Nolakoak izango dira zure asteburuak erretiroa hartzen duzunean?
E. Ume bat daukat eta bestea bidean. Beraz, badakit denbora asko beteko didatela. Ez dakit zenbat denbora gelditzen zaidan hori egiteko, baina urtebete sabatikoa hartzeko gogoa dut.

Asteburuan

Kaixo lagunak!!!

Gaur komentatu nahi dizuet lehengo asteburuan gertatu zitzaidana. Ni futbol entrenatzilea naiz eta asteburu guztiak bezala nire taldea partidu bat zeukan. hasi zenean partidua ikusi genuan arbitroa nahiko berria zela eta pixka bat galduta zegoela. Dena den nire konportamendua berarekin laguntzarena izan zen eta ezta jokaldi batean ere ez protesta egin nuen. Hala ere, gurasoek partidua ikusten ari ziren, eta lehenengo momentutik protestaka ari ziren, ia-ia iraindu arte. Hori dela eta umeak baita ere hasi ziren izugarri protestaka bere gurasoak horrela ikusi zituztenean. Dena den nik ez nien utzi protestarik egitea.

Hori ikusita, galdera bat jarriko dut hemen guztiak komentatzeko bere aburua; ez al gara konturatzen gure portaera gure umeena aldatzen duela?

Eskerrik asko jarraitzeagatik.